ಮಾತು ಎಂದರೆ ಭಾಷೆ, ಆಣೆ, ಪ್ರಮಾಣ
ವೂ ಕೂಡ ಎಂದನ್ನುತ್ತದೆ ಅರ್ಥ ಕೋಷ.
ಆದರೆ ನಿಘಂಟಿಗಂಟದ ನೆಂಟ
ಪುರಾವೆಗೆ ಸಾಕ್ಷಿ ಕೇಳುತ್ತಾನೆ,
ಮಾತಿಗಿರುವ ಅರ್ಥವನ್ನೇ ಪ್ರಶ್ನಿಸುತ್ತಾನೆ,
ಧರ್ಮರಾಯನಿಗೆ ಕೇಳಿದ್ದ ಅರ್ಧ ಮಾತನ್ನೇ
ಉದಾಹರಿಸಿ, ಶಂಖ ಜಾಗಟೆ ಮೊಳಗಿಸುತ್ತಾನೆ.
ಎಲ್ಲೋ ಅಪರೂಪಕ್ಕೆ ಒಬ್ಬ ಕರ್ಣ
ಮಾತು ತಪ್ಪದ ಮಗ, ಅವನಿಗಂಟಿದ್ದ
ಕೀರ್ತಿ ಶನಿಯ ಮೆರೆಯಲೋಸುಗ
ತೊಟ್ಟ ಬಾಣವ ತೊಡದೇ ಮಡಿಯುತ್ತಾನೆ,
ಮಾತಿಗೂ ಝಳದ ಬಿಸಿ ಇದೆಯೆಂದೇ
ಬಾಹುಬಲಿ ಬೆತ್ತಲಾಗಿ ನಿಲ್ಲುತ್ತಾನೆ!
ಅಪ್ಪ ಕೊಟ್ಟ ಮಾತನ್ನೇ ತೊಟ್ಟ ಮಗ
ಯಮನ ಮನೆಗೇ ನಡೆಯುತ್ತಾನೆ,
ಇನ್ನೊಬ್ಬನಂತೂ ಹೆತ್ತಮ್ಮನ ಕೊರಳ
ಕತ್ತರಿಸಿ, ಕಡೆಗೂ ಒಗ್ಗೂಡಿಸುತ್ತಾನೆ ಸಂ
ಸಾರ ಸಾಗರದ ಅರ್ಥಕ್ಕೆ ಹೊಸ ರೂಪ
ಕೊಟ್ಟೂ ಅನ್ಯಥಾ ಸಿಕ್ಕವರನ್ನೆಲ್ಲ ಕೊಚ್ಚುತ್ತಾನೆ.
ಮಾತೆಂಬುದು ಜ್ಯೋತಿರ್ಲಿಂಗ ಅನ್ನು
ವುದು ಸುಲಭ, ನಡೆಸುವುದು ಕಡು ಕಷ್ಟ
ಅನ್ನಿಸಿದಾಗಲೆಲ್ಲ, ಮಾತಿಗೂ ಅರ್ಥ ಇದೆ
ವ್ಯಾಪ್ತಿ ಇದೆ, ಕಡೆಗೆ ಗುರಿ ಮುಟ್ಟುವುದಕ್ಕೆ
ಮೆಟ್ಟಿಲೇ ಇದ್ದಕ್ಕಿದ್ದಂತೆ ಮಾಯವಾದಂತಿದೆ
ಎನ್ನುವುದು ಕೇವಲ ಇವತ್ತಿನದಲ್ಲ,
ಜಾಯಮಾನಕ್ಕೆ ಅಂಟಿದ ನಂಟು
ಮಾತು ತಪ್ಪಿದವರೇ ಧರಣಿ ಆಳಿದ
ಸಾಕ್ಷಿ, ಪುರಾವೆ, ನಿದರ್ಶನಗಳು ಸಾವಿರಾರು!
